Wednesday, 21 October 2026

قرآن مجید کی تاثیر ہم پہ اثر کیوں نہیں کرتی؟

قرآن مجید کی تاثیر ہم پہ اثر کیوں نہیں کرتی؟

تحریر : ابو بکر صدیق 

 قریش مکہ سخت اسلام مخالف تھے مگر وہ قرآن سنتے تو ان کے دل بدل جاتے۔ کسی بھی صحابی کے قبول اسلام کو پڑھ لیں وہ قرآن سے متاثر ہوئے اور اپنے سابقہ عقیدے کو چھوڑ کر اسلام کی آغوش میں آ گئے۔

کفار مکہ نے رسول اللہ ﷺ پر جو الزامات عائد کئے، ان میں سے ایک یہ بھی تھا کہ یہ شخص ساحر (جاودگر) ہے۔ یہ الزام خود بتا رہا ہے کہ لسانِ رسالت سے قرآن مجید سن کر ان کے دل اس طرح بے اختیار اس کی طرف کھنچے چلے جاتے تھے جیسے کسی نے ان پر جادو کردیا ہو۔ یہی وجہ ہے کہ وہ ہمیشہ اپنے لوگوں سے کہتے :
(ترجمہ)’’تم اِس قرآن کو مت سنا کرو اور اِس (کی قرأت کے اوقات) میں شور و غل مچایا کرو تاکہ تم (اِن کے قرآن پڑھنے پر) غالب رہو۔‘‘ (سورہ فصلت:۲۶)
اور اسی لئے وہ مکہ میں ہر نووارد کو نصیحت کرتے کہ اپنے کانوں میں روئی ٹھونس لو کیونکہ یہاں محمدؐ نامی ایک شخص اپنے کلام کے زور سے لوگوں پر جادو کردیتا ہے۔
وہ کون سا قرآن تھا جو کفار مکہ کو متاثر دیتا تھا اگر یہی قرآن تھا تو ہمارے کان پہ اس کو سن کر جوں کیوں نہیں رینگتی؟
معلوم ہوتا ہے کہ حضرت عمرؓ پانچ سال تک اگر اسلام نہیں لائے تو اس کی وجہ یہ تھی کہ اپنے آبائی دین میں تصلب (مضبوطی، سختی) کی وجہ سے انہوں نے اپنے کان میں قرآن مجید کی آواز پڑنے ہی نہیں دی۔ جوں ہی اپنی بہن کے گھر میں یہ آواز اُن کے کان میں پڑی، ان کے دل کی دنیا بدل گئی اور وہ جو شمشیر بکف ہوکر گھر سے نکلے تھے کہ آپؐ کا کام تمام کردیں گے، اب گردن بزیر ہوکر آپؐ کی خدمت میں حاضر ہوئے۔
کفار مکہ کی ایذارسانیوں سے تنگ آکر حضرت ابوبکرؓ مکہ سے باہر جانے لگے تو ابن الدغنہ نے کہا: آپ جیسے شریف انسان کا مکہ سے چلے جانا اہلِ مکہ کی بدنصیبی ہوگی۔ آج سے آپ میری امان میں ہیں۔ پوری آزادی کے ساتھ اپنے دین پر عمل کریں، کسی کو آپ کے درپئے آزار کی جرأت نہ ہوگی۔ روایات میں ہے کہ حضرت ابوبکرؓ جب رات کو نماز کے لئے کھڑے ہوتے اور قرآن مجید کی تلاوت کرتے تو پاس سے گزرنے والا ہر شخص اُسے سن کر متاثر ہوئے بغیر نہ رہتا۔ یہ دیکھ کر اہل مکہ چیخ اٹھے کہ ابوبکر کی اس تلاوت ِ قرآن سے ہماری عورتیں، بچے اور نوجوان آبائی دین سے منحرف ہوئے جاتے ہیں۔ وہ سب اکٹھے ہوئے اور ابن الدغنہ سے کہا کہ ابوبکر کو ایسا کرنے سے روکو ورنہ پوری قوم صابی (ایک دین سے منحرف ہوکر دوسرے دین کی طرف جانے والا) ہوجائے گی۔ چنانچہ ابن الدغنہ کو حضرت ابوبکرؓ کو دی گئی امان سے دستبردار ہونا پڑا۔
ولید بن مغیرہ نے ایک روز رؤسائے قریش سے کہا: آج رات میں اس شخص (محمدؐ) کا جائزہ لے کر تمہیں بتاؤں گا۔ چنانچہ وہ ایسے وقت پہنچا جب آپﷺ نماز میں قرآن مجید تلاوت فرما رہے تھے ۔ دیر تک کھڑا سنتا رہا۔ واپس لوٹا تو لوگوں سے کہنے لگا :
’’میں نے ایک شیریں، شاداب اور بارآور کلام سنا ہے جو دلوں میں اترتا چلا جاتا ہے۔‘‘
انہوں نے سوال کیا: تو کیا وہ شعر ہے؟
اس نے کہا: ’’مجھ سے بڑھ کر شعر کا شناسا کون ہوسکتا ہے۔ خدا کی قسم !وہ شعر نہیں۔‘‘
انہوں نے پوچھا: تو کیا محمدؐ کاہن ہے اور اس کا یہ کلام کہانت کی کوئی قسم ہے؟
اس نے جواب دیا: ’’ہرگز نہیں، کیونکہ میں کہانت سے بھی خوب واقف ہوں۔‘‘
انہوں نے کہا : تو کیا وہ جادو ہے؟
کہنے لگا: ’’میں نہیں جانتا ، لیکن اگر وہ (مخلوق کے کلام کی قسموں میں سے) کوئی چیز ہوسکتا ہے تو وہ جادو ہی ہے۔‘‘
خالد بن عقبہ نے قرآن مجید سن کر اس پر ان الفاظ میں تبصرہ کیا کہ:
’’خدا کی قسم! اس میں ایک عجیب مٹھاس ہے اور اس میں ایک عجیب تروتازگی ہے۔ اس کی جڑیں شاداب اور اس کی شاخیں پھلوں سے لدی ہوئی ہیں اور ایسا کلام کوئی انسان نہیں کہہ سکتا۔‘‘
کہتے ہیں کہ ایک دفعہ قریش کے تین بے مثال بلیغ خطیب … ولید بن مغیرہ، اخنس بن قیس اور ابوجہل… مختلف مقامات سے رات کے وقت رسول اکرم ﷺ کو اپنے گھر میں قرآن مجید پڑھتے ہوئے سنتے رہے یہاں تک کہ صبح ہوگئی۔ واپسی پر جب اُن کی باہم ملاقات ہوئی تو انہوں نے ایک دوسرے کو (اس حرکت پر) ملامت کی اور کہا کہ اگر عوام ہمیں ایسا کرتے ہوئے دیکھ لیں اور وہ بھی قرآن سننے لگیں تو وہ فوراً ایمان لے آئیں گے۔
دوسری شب کو بھی انہوں نے یہی کچھ کیا اور پھر جب باہم ملے تو پہلے سے بھی زیادہ اس حرکت پر شرمسار ہوئے اور قسم کھائی کہ آئندہ ایسا نہیں کریں گے۔
دن چڑھا تو ولید بن مغیرہ، اخنس بن قیس کے پاس آیا اور کہنے لگا: ’’جو کچھ تم نے محمدؐ سے سنا، اُس کے بارے میں تمہاری کیا رائے ہے؟‘‘ اخنس نے کہا: ’’میں کیا کہہ سکتا ہوں۔ بنوعبدالمطلب نے کہا کہ ہم حاجب ہوں گے، ہم نے تسلیم کرلیا، انہوں نے کہا ہم خانہ ٔ کعبہ کے متولی ہوں گے ،ہم مان گئے ۔ انہوں نے حاجیوں کی سقائی کا کام اپنے ذمے لیا، ہم نے مزاحمت نہ کی۔ اب وہ کہتے ہیں کہ ہم میں نبی بھی آیا ہے جس پر وحی نازل ہوتی ہے۔ خدا کی قسم! میں تو اس پر ہرگز ایمان نہیں لاؤںگا۔‘‘
یہ واقعہ بتارہا ہے کہ رموز سخن سے آشنا ان لوگوں کے دلوں میں قرآن مجید نہ صرف اپنے مضامین بلکہ اپنی فصاحت و بلاغت کے لحاظ سے بھی اتر چکا تھا ، مگر اُن کی وہ شُعوبی (خاندانی) عصبیت ِ جاہلیہ آڑے آتی رہی جس کے نتیجے میں اور وہ ایمان نہ لائے۔
ثمامہ بن آثال، مخالفین کے پروپیگنڈے سے متاثر ہوکر کہا کرتا تھا کہ میرے لئے محمدؐ کے چہرے سے زیادہ مبغوض کوئی چہرہ نہیں اور اس کے شہر (مدینہ) سے بڑھ کر کوئی شہر قابلِ نفرت نہیں، مگر جب گرفتاری کے بعد دو ہی روز تک مسجد نبویؐ میں براہِ راست آنحضرت ﷺ کی زبانِ مبارک سے قرآن مجید سننے کا اتفاق ہوا تو اب یہ کیفیت تھی کہ اس کے لئے حضورﷺ کی ذات ِ مبارکہ سے بڑھ کر کوئی ذات محبوب نہ تھی اور مدینہ منورہ سے بڑھ کر اسے کوئی شہر عزیز نہ تھا۔
ملک الشعراء ولید ، جس کے بعض شعروں پر، کہتے ہیں کہ شاعر اس کے سامنے سر بسجود ہوگئے تھے، قرآن مجید سے اس قدر متاثر تھا کہ ایک ملاقات میں جب حضرت عمرؓ نے اس سے اپنا تازہ کلام سنانے کی فرمائش کی تو کہنے لگا کہ ’’جب سے قرآن سنا ہے ، شعر کہنا چھوڑ چکا ہوں۔‘‘ بالفاظ دیگر ، قرآن مجید کے معجزانہ اسلوب کو دیکھ کر اس عظیم شاعر کو اپنا کلام حقیر دکھائی دینے لگا۔ جنوں کا وہ تاثر بھی یاد رکھئے جس میں غیرمعمولی حقیقت اور گہرائی تھی ’’ بیشک ہم نے ایک عجیب قرآن سنا ہے۔‘‘ (سورہ جن:۱)
یہ قرآن وہی ہے لیکن ہم اس سے مرغوب نہیں ہوے کیونکہ ہم نے قرآن براہ راست اہل دین سے موصول نہیں کیا بلکہ ہم اس قرآن کو براہ راست سننے کی بجائے کچھ فلٹر لگا دیے ہیں جن کے باعث قرآن ہم تک پہنچنے سے قبل اپنی تاثیر کھو دیتا ہے۔ خالق کا کلام اگر ہمارے دل میں تغیر پیدا نہیں کر رہا تو ہمیں اپنی پوزیشن کا جائزہ از سر نو لینا چاہیے۔

Thursday, 1 October 2026

خاموشیوں کا نوحہ گر

 خاموشیوں کا نوحہ گر

تحریر: ابوبکر صدیق

ہماری زندگی کے سب سے گہرے، سب سے تلخ اور سب سے خوبصورت فیصلے وہ ہوتے ہیں جن کے گواہ صرف ہم خود ہوتے ہیں۔ دنیا عدالتوں، مجلسوں اور اخبارات میں لکھی جانے والی باتوں کو تاریخ سمجھتی ہے، مگر حقیقت یہ ہے کہ انسانی تاریخ کا اصل اور بڑا حصہ وہ ہے جو کبھی زبان پر آ ہی نہیں سکا۔ وہ آنسو جو پلکوں کی سرحد پار نہ کر سکے، وہ شکوے جو لبوں پر آ کر دم توڑ گئے، اور وہ قربانیاں جن کا کوئی اشتہار نہیں چھپا—یہ سب کہاں جاتے ہیں؟ یہ سب انسان کے اندر خاموشی کی تہہ بن کر جمتے چلے جاتے ہیں۔
کرن کور کی کتاب Silent Author پر نظر پڑی تو یوں لگا جیسے کسی نے انسانی وجود کی اسی غیر تحریری تاریخ پر ہاتھ رکھ دیا ہو۔
ہم سب بنیادی طور پر مصنف ہیں، مگر مسئلہ یہ ہے کہ ہم اپنے شاہکار کاغذ پر نہیں، اپنے سینے میں دفن کرتے ہیں۔ لفظوں کی ایک مجبوری ہے۔ لفظ حدیں مانگتے ہیں، گرامر کے پابند ہوتے ہیں اور سماج کی مصلحتوں کے اسیر۔ مگر انسان کے دکھ اور اس کے سچے تجربات ان پیمانوں سے بہت بڑے ہیں۔ جب دکھ بہت گہرا ہو جائے تو زبان گنگ ہو جاتی ہے، اور جب سفر تنہائی کا ہو تو آواز ساتھ چھوڑ جاتی ہے۔ کرن کور اس کتاب میں ہمیں بتاتی ہیں کہ خاموشی محض آواز کی عدم موجودگی کا نام نہیں، بلکہ خاموشی بذاتِ خود ایک مکمل زبان ہے—ایسی زبان جسے صرف وہی پڑھ سکتا ہے جس نے خود کبھی ضبط کا زہر پیا ہو۔
اس کتاب کے صفحات سے گزرتے ہوئے قاری کو یوں محسوس ہوتا ہے جیسے کوئی اس کے ساتھ چلتے چلتے رک گیا ہو اور اس کے کندھے پر ہاتھ رکھ کر پوچھ رہا ہو، ”تم تھک تو نہیں گئے؟“
ہماری اجتماعی زندگی کا المیہ یہ ہے کہ ہم سب بولنے کی جلدی میں ہیں۔ کوئی سننا نہیں چاہتا۔ سوشل میڈیا کے اس غلغلے اور شور کے دور میں، جہاں ہر شخص اپنی رائے کی نمائش میں ہلکان ہو رہا ہے، وہاں خاموشی کی وقعت کو سمجھنا کسی نعمت سے کم نہیں۔ کرن کور نے کمال مہارت سے ان نازک رشتوں، بکھرتے خوابوں اور صدموں کے بعد دوبارہ سنبھلنے کی اس طویل اور کٹھن مشقت کو قلمبند کیا ہے جسے دنیا اکثر نظر انداز کر دیتی ہے۔ وہ قاری کو بیرونی دنیا کی چکاچوند سے کھینچ کر اس کے اپنے اندر جھانکنے پر مجبور کرتی ہیں۔
Silent Author پڑھتے ہوئے انسان کو بار بار یہ احساس کچوکے لگاتا ہے کہ ہم جن باتوں کو اپنی کمزوری سمجھ کر چھپاتے رہے، وہی دراصل ہماری اصل طاقت تھیں۔ یہ کتاب روایتی نصیحتوں یا گھسے پٹے فلسفوں کا پلندہ نہیں، بلکہ یہ ایک ایسا آئینہ ہے جس میں ہر حساس شخص کو اپنا اندرونی وجود بے نقاب نظر آتا ہے۔
کرن کور نے ثابت کیا ہے کہ زندگی کا سب سے بڑا لکھاری انسان کا قلم نہیں، بلکہ اس کا وہ صدمہ، وہ تنہائی اور وہ ضبط ہوتا ہے جو خاموشی سے دل کے اوراق پر داستانیں رقم کرتا رہتا ہے۔ یہ کتاب ہر اس شخص کے لیے ایک خاموش مرہم ہے جو دنیا کے ہجوم میں خود کو اکیلا پاتا ہے اور جس کے پاس اپنے دکھ کا کوئی گواہ نہیں سوائے اس کے اپنے وجود کے